1 groot hoender Sout en peper 3 heel naeltjies of ¼ t fyn naeltjies 4 e sago ½ pakkie sampioensop (opsioneel) gesnipperde sampioene (opsioneel) Geur hoender en kook tot sag. Ontbeen en sit ontbeende vleis in die sous wat oorgebly het. Sit sampioene en sampioensop by. Kook die sago in melk in die mikrogolf tot deurskynend. ’n Mens kan ook die sago by die hoender voeg en kook tot deurskynend. Proe en geur totdat jy van die smaak hou. ’n Bietjie aromat verrig wondere vir ekstra smaak of geur. Die pasteideeg vir “lui vroue soos ek”. 1k koekmeel 2 t bakpoeier 125 ml botter of margarien ¾ k melk 1 eier 2 ml sout Vryf botter in meel. Klits eier, melk en meng dit in die meel in vir ’n slap deeg. Drup bo-oor die hoender en bak by 180°C. Wanneer die luivroudeeg gebruik word, moet die vleis lekker souserig wees. Die vleissous bak “in die deeg in”. Dit deug ewe goed op maalvleis of wildvleis wat ontbeen is. ’n Mens kan ook die deeg gebruik as ’n soetkors vir gestoofde vrugte of oor ingelegde perskes vir poeding. Gooi net 2 e suiker in die deeg. “Vir ’n deftige pastei, gebruik ek die resep van me. Joey Pienaar van Knuppeldik aan Koningskos-faam. Dit is die maklikste en lekkerste resep,” sê Kotie. Skilferkorsdeeg 4½ k koekmeelblom 1 t sout 1½ t kremetart (hoogvol) 1 botteltjie yskoue sodawater (280 ml) 2 eiergele (net die geel, wit maak die deeg taai) 25 ml (2e) witasyn 500 g botter wat yskoud is. Gooi 4 koppies meel, sout en ½ t kremetart in ’n mengbak. Meng ½ k meel en 1 t kremetart in aparte bakkie en hou eenkant. Rasper ’n derde van die botter in die meel. Terwyl jy rasper “fluff” die botter in die meel in sodat dit nie ’n klont of hoop vorm nie. Vryf dan die botter in die meelblom in. Gooi yskoue sodawater, wat goed geklits is, saam met die eiers en asyn in en meng tot al die sodawater geabsorbeer is. Plaas die deeg in ’n plastieksak en gooi vir 30 sekondes lank op ’n tafel. Plaas die deeg en die oorblywende botter in die yskas vir minstens twee uur. (Botter verkieslik in vrieskas want dit moet baie koud wees.) Haal deeg uit yskas en rol uit in ’n groot reghoek. Rasper volgende derde botter oor die een helfte van die deeg. Versprei die botter sodat dit eweredig op die helfte van die deeg lê en strooi die helfte van die ½ k meel met kremetart wat jy eenkant gebêre het, bo-oor. Vou die ander helfte bo-oor en rol weer uit. Daar vorm lugblase in die deeg, wat so moet wees. Vou nou die oopgerolde deeg in drie (dus die linkerkant oor die middel en dan die regterkant bo-oor die linkerkantste deel). Vou nog ’n keer van onder na bo in drie dele. Rol weer oop in groot reghoek en herhaal met die laaste derde van die botter wat jy rasper, versprei en laaste van meel met kremetart oorstrooi. Jy moet nie dat die deeg warm raak nie. Jy kan dit in die yskas sit voordat jy die laaste botter oor rasper en rol. Hoe meer kere jy dit rol, hoe ligter gaan die deeg wees. Die botter wat ingesit is. moenie heeltemal weggewerk word in die deeg nie. Daar bly geel stippels van die botter, wat help om dit ligter te laat rys. Nadat jy dit die laaste keer gerol het en in ’n “blokkie “ opgevou het, is jou deeg reg vir gebruik. Rol dit soos ’n rolkoek op en sny dit in gerieflike rolle vir later gebruik en plaas vir ten minste agt ure in yskas. Rol uit en druk af vir tertjies of wat jy ookal wil bak. Sit in tupperhouer met plastiek tussenin en sit in vrieskas tot benodig. Haal direk uit vrieskas en plaas in oond en bak by 200ºC tot ligbruin. Die deeg wat afval nadat jy uitgedruk het, is net reg vir worsrolletjies. Dit gaan nie so hoog rys soos die eerste uitrol s’n nie. As jy konfyttertjies maak, bak dit sonder konfyt en spuit konfyt in sodra dit uit die oond gehaal en nog warm is. Werk versigtig en lig vir teetydtreffers.